ronel

Dali na nga mapahimuslan sa liboan ka mga lumulopyo sa 36 ka mga kabukirang barangay ning syudad ang mga batakang serbisyo sa Cebu City Hall, kini human nga gisubhan karong adlawa Oktubre 25, 2013 Biyernes ang ‘City Hall sa Bukid’ nga anaa nahimutang sulod sa 9.2 ektaryang luna sa Cebu City Resource Management and Development Center kon CREMDEC, sa Sister Cities Drive, Barangay Taptap.

Mokabat ug Php 9,363,698.07 ang kantidad sa bag-ong satellite office sa City Hall gikan sa tinuig nga budget sa syudad sa 2011, nga mao ang phase 1 ug gitrabaho sa Goldfin Construction. Gibana-bana usab nga mokabat pa ug kapin sa Php14 Milyones ang magasto alang sa ikaduha ug ikatulong andana sa edepisyo nga gipangitaan pa ug pundo sa pagkakaron ug moagi pa usab ug public bidding.

Samtang gisugdan ug usa ka Santos nga Misa ang kalihokan nga gipangulohan ni Rev. Fr. Patricio Ornopia, pari gikan sa Archdiocese sa Sugbo.

Nangunay mismo si Cebu City Mayor Michael L Rama sa ribbon-cutting nga seremonyas human sa Misa ug misunod dayon ang pagblessing sa nagkadaiyang parte sa bag-ong edipisyo ning dakbayan ug ang hamubong programa.

Gitataw sa Mayor nga, ”Nagpasalamat ko nga nakaserbisyo ta dinhi sa kabukiran, ayaw mo kabalaka kay hutdon ko ni ug pagpasemento ang kadalanan dinhi lakip na sa tibuok syudad sa Sugbo, ‘This is just a beginning’. Ang akong palisiya dapat ang gobiyerno magpaduol gyod sa katawhan hilabina sa layo sa City Hall ug nga moabot ang serbisyo dinhi sa kabukiran.”

“Akong gusto nga kung naay sunog dinhi sa bukid, naa nay bombero dinhi ug dili na mag-gikan pa sa ubos; kung naay landslide, naa nay heavy equipments nga magamit dayon; ug kung naay emergency naa nay ambulance aron daling makaresponde,” dugang nga pamahayag sa Mayor.

Samtang human sa mensahe sa Mayor gisurpresa kini sa mga kawani sa dakbayan sa paghalad ug cake, kanta, pagbati, ug paglamano alang sa iyang umaabot nga ika-59 nga adlawng natawhan karong Lunes, Oktubre 28.

Karong Nobiyembre 4, 2013 Lunes pormal na usab nga sugdan ang pagtanyag sa mga batakang serbisyo sa City Hall sa Bukid nga langkoban sa Upat ka cluster sa mga serbisyo sa dakbayan nga mao ang Frontline, Support, Income Generation, ug ang Policies and Planning. Sa laing bahin gipahigayon usab ang ‘City Hall at Your Doorsteps’ kon ‘Piyesta sa Pagpangalagad’ sa CREMDEC human sa programa diin liboan ka mga lumulopyo sa kabukirang barangay ning syudad ang natabangan ug nakapahimulos sa mga libreng serbisyo nga gitanyag sa 22 ka departamento sa city hall.

Si Nenita Rom, 56 ang edad ug lumad nga taga Barangay Taptap, ug usa lamang sa natabangan sa programa nagkanayon nga, “Maayo gyod ang gibuhat sa Mayor kay dili nami makaplete ug mahasol sa pag-adto sa syudad kay naa na gyod dinhi nagpaduol namo ang serbisyo sa City Hall.”

Dugang pa mokabat usab ug Php50.00 ang plete matag usa sa pampublikong sakyanan gikan sa CREMDEC paingon sa Cebu City Hall nga adunay 24 kilometros ang gilay-on ug 40 minutos nga pagbiyahe subay sa Transcentral Highway ug Veterans Drive.